កម្រង សំនួរ វេយ្យាករណ៍បាលី ខទី ៤១_៤៥
៤១. តប្បុរិសសមាសប្រែថាដូចម្តេច? បានសេចក្តីយ៉ាងណា? មានប៉ុន្មានយ៉ាង?អ្វីខ្លះ?
ឆ.ប្រែថា ការបំប្រួញសព្ទតាមបុរសនោះ។ បានសេចក្តីថា នាមសព្ទដែលផ្សំនឹងវិភត្តិនាមមានទុតិយាវិភត្តិជាដើម ហើយបំប្រួញរួមចូលនឹងបទខាងចុងដែលមានវិភត្តិផ្សេងគ្នា ហៅថាតប្បុរិសសមាស។ មាន៦យ៉ាង។ គឺ
ទុតិយាតប្បុរិស១ តតិយាតប្បុរិស១ ចតុត្ថីតប្បុរិស១
បញ្ចមីតប្បុរិស១ ឆដ្ឋីតប្បុរិស១ សត្តមីតប្បុរិស១
រាប់ឧភយតប្បុរិស១
បញ្ចូលផងត្រូវជា៧។
៤២. ទ្វន្ទ្វសមាសប្រែថាដូចម្តេច? បានសេចក្តីយ៉ាងណា? មានប៉ុន្មានយ៉ាង? ចូររាប់?
ឆ.ប្រែថា ការបំប្រួញនូវសព្ទដូចជាទូកទាំងឡាយពីរ។
បានសេចក្តីថា នាមសព្ទចាប់ពី២បទឡើងទៅដែលមានវិភត្តិស្មើគ្នា បំប្រួញចូលជាបទ១ហៅថា
ទ្វន្ទ្វសមាស។ មាន២យ៉ាង។ គឺ សមាហារទ្វន្ទ្វ១ អសមាហារទ្វន្ទ្វ១។
៤៣. អព្យយីភាវសមាសប្រែថាដូចម្តេច? បានសេចក្តីយ៉ាងណា? មានប៉ុន្មានយ៉ាង?អ្វីខ្លះ?
ឆ.ប្រែថា ការបំប្រួញនូវភាវនៃសព្ទមានសេចក្តីមិនប្រែប្រួល។
បានសេចក្តីថា សមាសដែលមានឧបសគ្គ ឬនិបាតនៅខាងដើម ហើយជានបុំសកលិង្គ
បើទុកជាពហុវចនៈក៏មានអាការៈជា នបុំសកលិង្គ ឯកវចនៈ ហៅថា អព្យយីភាវសមាស។ មាន២យ៉ាង។ គឺ
ឧបសគ្គបុព្វកៈ១ និបាតពុព្វកៈ១។
៤៤. ពហុព្វីហិសមាសប្រែថាដូចម្តេច? បានសេចក្តីយ៉ាងណា? មានប៉ុន្មានយ៉ាង?ចូររាប់?
ឆ.ប្រែថា សមាសមានស្រូវច្រើន។ បានសេចក្តីថា សមាសដែលមានបទឯទៀត ក្នុងវិគ្គហៈស្ទុះចេញមកជាបទប្រធាន ហៅថា ពហុព្វីហិសមាស។ មាន៦យ៉ាងគឺ៖ ទុតិយាពហុព្វីហិ១ តតិយាពហុព្វីហិ១ ចតុត្ថីពហុព្វីហិ១
បញ្ចមីពហុព្វីហិ១ ឆដ្ឋីពហុព្វីហិ១ សត្តមីពហុព្វីហិ១
រាប់ សហបុព្វបទពហុព្វីហិ១
បញ្ចូលមកផងត្រូវជា៧។
៤៥. ឯកសេសសមាសប្រែថាដូចម្តេច? បានសេចក្តីយ៉ាងណា? មានប៉ុន្មានយ៉ាង?អ្វីខ្លះ?
ឆ.ប្រែថា សមាសមានសព្ទសល់នៅតែសព្ទមួយ។ បានសេចក្តីថា
អសមាហារទ្វន្ទ្វសមាស ដែលលុបបទឯទៀតចេញទុកតែបទមួយ ហៅថា ឯកសេសសមាស។
👉👉 មានសំនួរបន្តទៀត
សូមចុចអាសយដ្ឋានខាងក្រោម ៖
សូមអរព្រះគុណនិងអរគុណ!