ពង្សាវតារ ព្រះរាជត្រកូលព្រះពុទ្ធសមណគោតម
ត្រកូលខាងព្រះបិតា
ស្ដេចសាក្យៈវង្សព្រះនាម «ជយសេន» នគរកបិលពស្តុ
មានព្រះរាជបុត្រមួយអង្គនាម «សីហហនុ» និងព្រះរាជធីតាមួយអង្គនាម «យសោធរា» ។ \
ព្រះនាងយសោធរា
បានរៀបអភិសេកជាមួយព្រះអង្គម្ចាស់ «អញ្ជនៈ» នៃរាជវង្សកោលិយៈ នគរទេវទហៈ ។
ចំណែកព្រះអង្គម្ចាស់សីហហនុ
បានរៀបអភិសេកជាមួយព្រះនាង «កញ្ចនា» ហើយបានជាស្ដេចស្នងរាជ្យបន្តពីព្រះបិតានៅនគរកបិលពស្តុតរៀងមក
ព្រះអង្គបង្កើតបានព្រះរាជបុត្រ៥អង្គគឺ «សុទ្ធោទនៈ»
«ធោតោទនៈ» «សក្កោទនៈ» «សុក្កោទនៈ» «អមិតោទនៈ» និងរាជធីតា២អង្គគឺព្រះនាង «អម្មិតា» និង «បមិតា» ។
ព្រះអង្គម្ចាស់សុទ្ធោទនៈ
ត្រូវបានជ្រើសតាំងជាស្ដេចគ្រងរាជសម្បត្តិស្នងព្រះបិតា
ហើយបានរៀបអភិសេកជាមួយព្រះនាង «សិរីមហាមាយា» ទ្រង់ប្រសូតបានព្រះរាជបុត្រមួយអង្គនាម
«សិទ្ធត្ថ» ។
ក្រោយពីព្រះនាងសិរីមហាមាយា
ទ្រង់ចូលទីវង្គតទៅ ស្ដេចសុទ្ធោទនៈទ្រង់ជ្រើសយកព្រះនាង «បតិគោតមី» អភិសេកជាព្រះអគ្គមហេសីបន្ត
ទ្រង់ប្រសូតបានរាជបុត្រមួយអង្គនាម «នន្ទ» និងរាជធីតាមួយអង្គនាម «សុន្ទរីនន្ទា (រូបនន្ទា)» ។
ព្រះអង្គម្ចាស់សិទ្ធត្ថ
(តួអង្គព្រះពោធិសត្វ) បានរៀបអភិសេកជាមួយព្រះនាង «យសោធរា (ពិម្ពា)» ប្រសូតបានព្រះរាជបុត្រមួយអង្គនាម
«រាហុល» ។
ត្រកូលខាងព្រះមាតា
ស្ដេចកោលិយវង្ស ព្រះនាម «ទេវទហៈ» នគរទេវទហៈ
មានរាជបុត្រមួយអង្គនាម «អញ្ជនៈ» និងរាជធីតាមួយអង្គនាម «កញ្ចនា» (មហេសីរបស់ស្ដេចសីហហនុ) ។
ព្រះអង្គម្ចាស់អញ្ជនៈបានជាស្ដេចនៃនគរទេវទហៈ
មានអគ្គមហេសីនាម «យសោធរា» ប្រសូតបានរាជបុត្រ២អង្គគឺ «សុប្បពុទ្ធ» និង «ទណ្ឌបាណិ» និងព្រះរាជបុត្រី២អង្គគឺព្រះនាង
«សិរីមហាមាយា» និងព្រះនាង «បជាបតិគោតមី» ។
ព្រះអង្គម្ចាស់សុប្បពុទ្ធ
ត្រូវបានជ្រើសតាំងជាស្ដេចនគរទេវទហៈបន្តពីព្រះបិតា
ទ្រង់រៀបអភិសេកជាមួយព្រះនាង «បមិតា» ហើយប្រសូតបានព្រះរាជធីតាមួយអង្គនាម
«យសោធរា (ពិម្ពា)» និងរាជបុត្រមួយអង្គនាម «ទេវទត្ត» ។
ចំណែកព្រះនាងសិរីមហាមាយា
និងព្រះនាងបជាបតិគោតមី បានជាព្រះមហេសីរបស់ស្ដេចសុទ្ធោទនៈ ៕
ចម្លងនៅគេទំព័រ៖ ឈូកខ្មែរ