បរមាធិប្បាយ មេរៀនជីវិត
កម្លាំងចិត្តក្នុងការតស៊ូ
គន្លងដល់ជោគជ័យ និងសុភមង្គល
ជីវិតមនុស្សមិនមែនជាផ្លូវត្រង់ដែលធ្វើឲ្យឈានទៅកាន់ជោគជ័យបានដោយស្រួលទេ។
វាជាផ្លូវដែលពោរពេញដោយឧបសគ្គ ការបរាជ័យ និងការប្រឈមមុខជាច្រើន។
តែមានអ្វីមួយដែលធ្វើឲ្យមនុស្សខុសគ្នា វាជាកម្លាំងចិត្តក្នុងការតស៊ូ។
កម្លាំងចិត្តនេះមិនមែនសម្រាប់ជឿគ្រប់សេចក្តីសុបិន់ទេ
ប៉ុន្តែសម្រាប់ការបង្កើតមនុស្សឲ្យមានភាពរឹងមាំ
និងចេះអត់ធ្មត់ក្នុងការប្រឈមមុខនឹងជីវិត។
ជីវិតពោរពេញដោយអ្វីៗមិនច្បាស់លាស់
ហើយមនុស្សភាគច្រើនតែងតែខកចិត្ត ឬបោះបង់ចិត្តនៅពេលជួបបញ្ហា។
ប៉ុន្តែអ្នកដែលចេះតស៊ូយល់ថា ការប្រឈមមុខនឹងអ្វីដែលគេហៅថា "បញ្ហា"
គឺជាឱកាសក្នុងការអភិវឌ្ឍខ្លួនឯង។ កម្លាំងចិត្តនេះជាផ្នែកមួយនៃការរៀន
និងការរីកចម្រើន។
មេរៀនជីវិតបានបង្រៀនថា ការតស៊ូ គឺជាគន្លងដ៏សំខាន់ទៅរកភាពជោគជ័យ។
មនុស្សដែលខិតខំតស៊ូ ដូចជាអ្នកដំណើរដែលមិនបោះបង់ចិត្ត ពួកគេចេះ៖
-
ឈ្នះចិត្តខ្លួនឯង ទោះបីជាជួបបញ្ហា។
-
រៀនពីកំហុស និងបរាជ័យ ដើម្បីកែលម្អខ្លួនឯង។
-
ចង់ឈានដល់គោលដៅដោយមានប្រាជ្ញា និងគោលបំណងច្បាស់លាស់។
ឧទាហរណ៍ដ៏ល្បីក្នុងប្រវត្តិសាស្ត្រ គឺ Thomas Edison ដែលបានបរាជ័យជាច្រើនពាន់ដង
មុននឹងរកឃើញអំពូលភ្លើង។ គាត់មិនបោះបង់ទេ ព្រោះគាត់ចេះថា
បរាជ័យគឺជាគ្រូបង្រៀនដ៏ល្អបំផុត។
ការតស៊ូមិនមែនគ្រាន់តែធ្វើអ្វីមួយប៉ុណ្ណោះ
តែជាការបន្តជឿជាក់លើខ្លួនឯង និងការប្រើប្រាស់គំនិតស្របតាមគោលបំណង។
ទោះបីជាការតស៊ូមានអត្ថន័យយ៉ាងខ្លាំងក៏ដោយ
មនុស្សមួយចំនួនមានទស្សនៈខុសថា៖
“ការតស៊ូមិនអាចធានាជោគជ័យបានទេ។”
ពួកគេយល់ថា ជីវិតមិនអាចសម្រេចបានត្រឹមតែដោយការខិតខំទេ
ប៉ុន្តែត្រូវការសំណាង ឱកាស និងបរិស្ថានគាំទ្រផងដែរ។ មានមនុស្សដែលខិតខំយ៉ាងខ្លាំង
ប៉ុន្តែមិនទទួលបានជោគជ័យ ដោយសារបញ្ហាបរិស្ថាន ឬឱកាសមិនគាំទ្រ។
បន្ថែមទៀត ការតស៊ូដោយគ្មានគោលបំណង
ឬគ្មានការគ្រប់គ្រងអារម្មណ៍ អាចនាំឲ្យបាត់បង់សុខភាព និងសុភមង្គលផ្ទាល់ខ្លួន។
ដូច្នេះ មតិបដិបក្ខលើកឡើងថា ការតស៊ូគួរតែប្រកបដោយប្រាជ្ញា និងមានសមតុល្យ។
ការតស៊ូបែបមានប្រាជ្ញា
និងមានទិសដៅច្បាស់ គឺជាការរួមបញ្ចូលគ្នារវាងមតិស្រប
និងមតិបដិបក្ខ។ វាមានន័យថា៖
មនុស្សត្រូវរៀនស្គាល់ខ្លួនឯង និងច្បាស់លាស់អំពីគោលបំណង។
ប្រាជ្ញានឹងជួយឲ្យការខិតខំរបស់យើងមានប្រសិទ្ធភាព។
ការស្គាល់តម្លៃនៃបរាជ័យនឹងបង្កើតភាពជឿជាក់ក្នុងការបន្តដំណើរ។
កម្លាំងចិត្តពិតប្រាកដមិនមែនគ្រាន់តែឈ្នះបញ្ហានៅក្រៅទេ
ប៉ុន្តែឈ្នះចិត្តខ្លួនឯង និងកែលម្អខ្លួនឯងក្នុងការប្រឈមជីវិត។
ជីវិតមនុស្សមិនអាចឈានដល់ភាពជោគជ័យដោយស្រួលទេ។ តែអ្នកដែលចេះតស៊ូ មានប្រាជ្ញា
និងច្បាស់លាស់ក្នុងគោលបំណង នឹងអាចឈ្នះបញ្ហា និងឆ្ពោះទៅរកភាពជោគជ័យបាន។
កម្លាំងចិត្តក្នុងការតស៊ូ គឺជាគន្លងដ៏សំខាន់សម្រាប់ការរីកចម្រើនផ្លូវចិត្ត
និងការស្វែងរកសុភមង្គលពិតប្រាកដ។ មនុស្សដែលអាចគ្រប់គ្រងចិត្តខ្លួនឯងបាន
នោះពួកគេចេះរស់នៅដោយសុភមង្គល និងមានជោគជ័យនៅក្នុងជីវិត។
“ជោគជ័យមិនមកពីអ្វីដែលអ្នកទទួលបានទេ
តែមកពីអ្វីដែលអ្នកបានឈានដល់ដោយកម្លាំងចិត្ត និងការតស៊ូ។”
អត្ថបទដោយ៖ ទេពម្យូរ៉ា កូនខ្មែរក្រោម
តើមិត្តអ្នកអានទាំងអស់បានយល់យ៉ាងណាដែរ?
សូមបញ្ចេញយោបល់ដើម្បីជជែកគ្នាជាកល្យាណផង!!
ភិក្ខុ អកក្ខឡោ ថាច់ភឿកអាង
១០-១៥-២០២៥
CCP_PA