តើព្រះពោធិសត្វជានរណា?
ព្រះពោធិសត្វ គឺជាបុគ្គលម្នាក់
ដែលតាំងចិត្តប្រាថ្នាឲ្យបានត្រាស់ដឹងជាព្រះពុទ្ធ
ដោយការខិតខំព្យាយាមសាងបុណ្យបារមីយ៉ាងស្វិតស្វាញជាទីបំផុត។ ពាក្យថា «ពោធិសត្វ» សំដៅយកបុគ្គល
និងមហាសត្វទាំងឡាយដែលប្រកបដោយចិត្តបុណ្យដ៏ទូលំទូលាយ ព្រមទាំងមានបញ្ញាដ៏ជ្រាលជ្រៅ ។
«ពោធិ» ជាពាក្យបាលី
មានន័យថាបញ្ញាជាគ្រឿងត្រាស់ដឹង ។ «សត្ត» ពាក្យបាលី ឬ «សត្វ» ពាក្យសំស្ក្រឹតមានន័យ
ថាបុគ្គលដែលជាប់ជំពាក់ក្នុងអារម្មណ៍ ឬ បំណងណាមួយ។ ដូច្នេះពាក្យថា «ពោធិសត្វ» មានន័យថា «បុគ្គលដែលមានចិត្តជាប់ជំពាក់ក្នុងការត្រាស់ដឹង
ឬជាបុគ្គលដែលសាងចិត្តដើម្បីត្រាស់ដឹង» ។ ក្នុងន័យ នេះគម្ពីរមហាវគ្គដីកាទីឃនិកាយសម្ដែងថា
បញ្ញាណាចាក់ធ្លុះនូវធម៌ដែលគួរដឹងតាមសភាពពិតហេតុនោះឈ្មោះថា «ពោធិ»។
បុគ្គលនោះឯងឈ្មោះថា «ពោធិសត្វ» ព្រោះជាអ្នកអនុគ្រោះនូវសត្វ។ ហេតុនោះទើបលោកហៅថា
បណ្ឌិតសត្វពុជ្ឈនកសត្វ គឺជាអ្នកប្រកបដោយ «ពោធិចិត្ត» ។
តើអ្វីទៅដែលហៅថាពោធិចិត្ត?
ពោធិចិត្ត
មានន័យថាសន្ដានចិត្តនៃបុគ្គល
ដែលមានករុណានិងឆន្ទៈខ្ជាប់ខ្ជួនតែមួយគត់ហើយធំជាងគេប្រចាំជិវិត
គឺសេចក្ដីប្រាថ្នាឲ្យបានត្រាស់ជាព្រះសម្មាសម្ពុទ្ធ
ដើម្បីឲ្យបានរួចផុតចាកទុក្ខក្នុងសង្សារវដ្ដផង
និងដើម្បីជួយសង្គ្រោះដល់សត្វលោកទាំងពួងឲ្យរួចផុតចាកទុក្ខផងដែរ៕ ដោយ៖
ឥន្ទ្រីយ៍សិល៌១៣៨