សំនួរអក្សរសិល្ប៍
អំពីលក្ខណៈចលនា និងគោលនិយម នៃអក្សរសិល្ប៍
សំនួរទី ៤១ - ៥០
៤១, ដូចម្តេច ហៅថា សព្វរស? សព្វរស មានអ្វីខ្លះ?
សព្វរស គឺជាតម្លៃទូទៅនៃរឿង ដែលកវីនិពន្ធលើកយកមកប្រើក្នុងអត្ថបទ
ឬស្នាដៃរបស់ខ្លួន។ សព្វរស មាន៤យ៉ាង
1. តថរស
2. អច្ឆរិយរស
3. កុសលរស
4. និងសង្គមរស ។
៤២. តើប្រភេទអក្សរសិល្ប៍ និង ចលនាអក្សរសិល្ប៍ មានលក្ខណៈខុសគ្នាយ៉ាងណាខ្លះ ? ចូររកអំណះអំណាងមកបញ្ជាក់ផង?
ប្រភេទអក្សរសិល្ប៍ និង ចលនាអក្សរសិល្ប៍ មានលក្ខណៈខុសគ្នាដូចខាងក្រោម៖
ប្រភេទអក្សរសិល្ប៍៖ មានន័យថា បានដល់អក្សរសិល្ប៍ ដែលនិយាយរៀបរាប់ពីបែបបថផ្សេងៗ
ទាក់ទងនឹងការតាក់តែងជាប្រភេទរឿង មានប្រភេទជា
1.
សន្ទស្សន៍អក្សរសិល្ប៍
2.
ប្រលោមអក្សរសិល្ប៍
3.
ឧបទេសអក្សរសិល្ប៍
4.
នាដកអក្សរសិល្ប៍
5.
ទិដ្ឋិអក្សរសិល្ប៍ ។
ចលនាអក្សរសិល្ប៍៖ គឺជាអក្សរសិល្ប៍
និយាយពីដំណើរការប្រែប្រួលនៃអក្សរសិល្ប៍ តាមការនិយមនៃវណ្ណៈ ឬស្រទាប់សង្គមលើទ្រឹស្តី
ទស្សនៈ គោលគំនិតណាមួយ ក្នុងដំណាក់កាលនៃប្រវត្តិសាស្ត្រ។ ហើយមានដូចជា
1.
អក្សរសិល្ប៍ព្រាហ្មណ៍និយម
2.
អក្សរសិល្ប៍ពុទ្ធនិយម
3.
អក្សរសិល្ប៍ខេមរនិយម
4.
និងអក្សរសិល្ប៍បរទេសនិយម
។
៤២. តើអក្សរសិល្ប៍ មានគោលនិយមអ្វីខ្លះ?
អក្សរសិល្ប៍ខ្មែរ ត្រូវបានអ្នកនិពន្ធ សរសេរចងក្រងឡើងទៅតាមលោកទស្សនៈ
ដែលទទួលឥទ្ធិពលពីមជ្ឈដ្ឋានសង្គម។ ការទទួលឥទ្ធិពលនេះ
អ្នកនិពន្ធអាចទទួលគោលនិយមពីសាសនា ឬមនោគមន៍វិជ្ជាណាមួយ ឆ្លងតាមតន័យខាងលើនេះ
អក្សរសិល្ប៍ខ្មែរ មានគោលនិយមដូចជា៖
1. អក្សរសិល្ប៍ខ្មែរបែបព្រាហ្មណ៍និយម
2. អក្សរសិល្ប៍ខ្មែរបែបពុទ្ធនិយម
3. អក្សរសិល្ប៍ខ្មែរបែបខេមរនិយម
4. និងអក្សរសិល្ប៍ខ្មែរបែបបរទេសនិយម ។
៤៣. សង្គមឋានជាអ្វី ?
សង្គមឋាន
គឺជាមជ្ឈដ្ឋានប្រកបដោយសម្ភារះបញ្ញាញាណផ្លូវចិត្តរបស់មនុស្សក្នុងសង្គម ដែលត្រូវបានអ្នកនិពន្ធលើកយកមកបង្ហាញស្នាដៃទៅតាមសម័យកាលណាមួយក្នុងរឿង
។
៤៤. សង្គមបរិយាកាសនៃរឿងគឺជាអ្វី ? ចូរលើកឧទាហរណ៍មកបញ្ជាក់?
សង្គមបរិយាកាសនៃរឿង គឺជាទិដ្ឋភាពនៃរឿង
ដែលអ្នកនិពន្ធរៀបរាប់អំពីការរស់នៅរបស់សង្គមមនុស្សណាមួយ
ក្នុងសង្គមប្រកបដោយអាជីវកម្ម ជំនឿ ប្រពៃណី ទំនៀមទម្លាប់
ការគ្រប់គ្រងទំនាក់ទំនងសង្គមទៅតាមស្ថានភាពបរិយាកាសជាក់ស្តែងណាមួយ ។
ឧទាហរណ៍៖ រឿងទុំទាវ អ្នកនិពន្ធបានលើកយកជីវភាព ស្ថានភាព
ប្រជាជនរស់នៅដោយគោរពសាសនា ជឿជំនឿផ្សេងៗ បង្ហាញពីទំនាក់ទំនងរវាងអ្នកមាន អ្នកក្រ
អ្នកធំ អ្នកតូច ភាពយុត្តិធម៌ អយុត្តិធម៌នៅក្នុងសង្គម ។
៤៥. តើសង្គមប្រវត្តិជាអ្វី? ចូរលើកឧទាហរណ៍មកបញ្ជាក់ ?
សង្គមប្រវត្តិ គឺជាព្រឹត្តិការណ៍របស់ប្រវត្តិសាស្ត្រ
ដែលអ្នកនិពន្ធបានលើកឡើងក្នុងរឿង
ដោយផ្សារភ្ជាប់យ៉ាងជិតស្និទ្ធទៅនឹងប្រវត្តិសាស្ត្ររបស់សង្គមយ៉ាងជាក់ស្តែង។
ឧទាហរណ៍៖ សង្គមប្រវត្តិនៅក្នុងរឿងភូមិតិរច្ឆាន
ទាក់ទងទៅនឹងព្រឹត្តិការណ៍ប្រវត្តិសាស្ត្រសង្គមខ្មែរ នាសម័យអាណានិគមនិយមបារាំង ។
៤៦. តើសង្គមបញ្ហាជាអ្វី? ចូរលើកឧទាហរណ៍មកបញ្ជាក់?
សង្គមបញ្ហា
គឺជាបញ្ហាទាំងឡាយដែលមាននៅក្នុងសង្គមដូចជាជីវភាព សុខមលភាព បញ្ហាគ្រប់គ្រង
បញ្ហាអយុត្តិធម៌ បញ្ហាជំនឿ បញ្ហាប្រពៃណី ដែលអ្នកនិពន្ធបានលើកយកមកបង្ហាញក្នុងដំណើររឿង ។
ឧទាហរណ៍់៖ រឿងគូលីកំណែន អ្នកនិពន្ឋបានបង្ហាញបញ្ហាមួយចំនួន ដូចជា៖
អំណាចផ្តាច់ការការកេងប្រវ័ញ្ច ការជំរិតទារពន្ធពីពួកបារាំង
ការកែនប្រជាជនអោយធ្វើគូលីពួកជប៉ុនជាដើម ។
៤៧. តើសង្គមារម្មណ៍ជាអ្វី ? ចូរលើកឧទាហរណ៍មកបញ្ចាក់?
សង្គមារម្មណ៍ គឺជាផ្នត់គំនិត
ដែលកើតឡើងតាមរយៈការផ្ដិតយករបស់អ្នកនិពន្ឋមកផ្សារភ្ជាប់ទៅនឹងព្រឹត្តិការណ៍ជាក់ស្ដែងក្នុងសង្គម
ដែលមនុស្សភាគច្រើនគេយល់និងអោយតម្លៃដូចគ្នា ។
ឧទាហរណ៍៖ រឿងទុំទាវ | អ្នកនិពន្ធបានបង្ហាញពីផ្នត់គំនិតសង្គមមួយតាមទស្សនៈ “នំមិនធំជាងនាឡិ”
គឺជាសកម្មភាពជាក់ស្តែងដែលបង្ហាញពីអារម្មណ៍របស់មនុស្សក្នុងដំណាក់កាលនោះ
ដែលគេបានយល់ថា មានតែទ្រព្យសម្បត្តិ ទើបធ្វើអោយពួកគេទទួលបានសុភមង្គល
ដើម្បីសម្រេចគំនិតនេះការគ្រប់គ្រងគ្រួសារ មានលក្ខណៈផ្តាច់ការ នំមិនធំជាងនាឡិ
ដែលប្រព័ន្ធគំនិតនេះបានដក់ជាប់ក្នុងអារម្មណ៍ខ្មែរស្ទើរតែរហូតមកដល់សព្វថ្ងៃ ។
៤៨. ដូចម្តេច ហៅថា ប្រពៃណីទំនៀមទម្លាប់ ? តើដំណាក់កាលធំៗ នៃពិធីមង្គលការខ្មែរមានអ្វីខ្លះ ?
ប្រពៃណីទំនៀមទម្លាប់ គឺជាផ្នែកមួយនៃវប្បធម៌
ដែលគេនិយមប្រកាន់តាំងពីបុរាណមកដល់សព្វថ្ងៃនេះ ដូចជាពិធីមង្គលការ ពិធីកើត
ពិធីស្លាប់...។ ដំណាក់កាលធំៗ នៃពិធីមង្គលការខ្មែរមាន មុនពេលរៀបការ ពេលរៀបការ និងក្រោយពេលរៀបការ
។
៤៩. តាមប្រពៃណីនៃការស្លាប់ តើជនជាតិខ្មែរបានរៀបចំពិធីប៉ុន្មានដំណាក់កាល? អ្វីខ្លះ ?
តាមប្រពៃណីនៃការស្លាប់ ជនជាតិខ្មែរបានរៀបចំពិធីជា ៣ ដំណាក់កាល គឺ៖
មុនពេលស្លាប់ ពេលស្លាប់ និងក្រោយពេលស្លាប់ ។
៥០. ដូចម្តេច ហៅថា ការវិភាគតួអង្គ?
ដែលហៅថាការវិភាគតួអង្គ
គឺជាការអោយតម្លៃតួអង្គ តាមរយះអាការះខាងក្នុង អំពើសម្ដីរបស់តួអង្គ ឬការរកលក្ខណៈ
គុណសម្បត្តិ គុណវិបត្តិ របស់តួអង្គផ្ទាល់ ឬតាមរយៈពាក្យសំដីតួអង្គដទៃទៀត ។
ដូចជាតួអង្គព្រះរាម នាងសីតា ព្រះលក្សណ៍ និងមហាជម្ពូជាដើម ។
👉👉 មានសំនួរ/អត្ថបទ បន្តទៀត
សូមចុចអាសយដ្ឋានខាងក្រោម ៖
១ សំនួរអក្សរសិល្ប៍ សំនួរខទី ១_១០ ដូចម្តេចហៅថាអក្សរសិល្ប៍ ?(edu4kh.com)
២ សំនួរអក្សរសិល្ប៍ អំពី អក្សរសិល្ប៍ព្រាហ្មណ៍និយម និងលក្ខណៈអក្សរសិល្ប៍ សំនួរទី ១១ -២០ (edu4kh.com)
៣ សំនួរអក្សរសិល្ប៍ អំពី ភាសាខ្មែរ មានការវិវត្តន៍ធំៗ មុខងារអក្សរសិល្ប៍ សំនួរទី ២១ _ ៣០ (edu4kh.com)
៤ សំនួរអក្សរសិល្ប៍ អំពីប្រភេទអក្សរសិល្ប៍ និង គោលអាស្រ័យធំៗនៃអក្សរសិល្ប៍ សំនួរទី ៣១ _៤០ (edu4kh.com)
៥ សំនួរអក្សរសិល្ប៍ អំពីលក្ខណៈចលនា និងគោលនិយម នៃអក្សរសិល្ប៍ សំនួរទី ៤១ - ៥០ (edu4kh.com)
សូមអរព្រះគុណនិងអរគុណ!