សំនួរអក្សរសិល្ប៍
អំពី អក្សរសិល្ប៍ព្រាហ្មណ៍និយម និងលក្ខណៈអក្សរសិល្ប៍
សំនួរខទី ១១ -២០
១១. ដូចម្តេច ហៅថា អក្សរសិល្ប៍ព្រាហ្មណ៍និយម? នៅក្នុងចលនាអក្សរសិល្ប៍ព្រាហ្មណ៍និយម មានឧត្តមគតិ យ៉ាងដូចម្តេច?
ចលនាអក្សរសិល្ប៍ព្រាហ្មណ៍និយម ជាអក្សរសិល្ប៍ដែលមានទំនាក់ទំនងទៅនឹងលទ្ធិព្រាហ្មណ៍សាសនា។
អក្សរសិល្ប៍បែបនេះ គេតែងជឿលើអាទិទេពបីអង្គ គឺព្រះព្រហ្ម ព្រះឥសូរ
និងព្រះវិស្ណុ ឬព្រះនារាយ។
រឿងគោលព្រាហ្មនិយម គឺជារឿងមានលក្ខណះអស្ចារ្យ អច្ឆរិយៈ ហួសពីសមត្ថភាពរបស់មនុស្សទៀតផង
ជាពិសេសគោលគំនិតជាចម្បង គឺបង្ហាញពីមហិទ្ធិឫទ្ធិអំណាចដ៏ខ្លាំងពូកែរបស់តួអង្គ
ដែលជាតួអង្គតំណាងអាទិទេព ។
តួអង្គក្នុងរឿងបែបព្រាហ្មណ៍និយមមានភាពអច្ឆរិយៈ គឺតួអង្គឯកប្រុសជាអាទិទេព
និងតួអង្គឯកស្រីជាកំពូលនារីល្អឯក ។
អក្សរសិល្ប៍ព្រាហ្មណ៍ អប់រំមនុស្សអោយជឿលើអាទិទេព អប់រំអោយមានជំនឿថា៖ ទុក្ខសោក
ល្អ អាក្រក់របស់ខ្លួនបានមកពីអាទិទេពទាំងនេះ ធ្វើអោយមនុស្សខ្វះការតស៊ូ
ខ្វះការជឿជាក់លើខ្លួនឯង។
១២. ដូចម្តេច ហៅថា អក្សរសិល្ប៍បរទេសនិយម ?
ចលនាអក្សរសិល្ប៍បរទេសនិយម គឺជាអក្សរសិល្ប៍ដែលបានលើកយកទំនៀមទម្លាប់របស់បរទេសមកបង្ហាញ
ឬជារឿងបរទេសផ្សេងៗមកបកប្រែជាភាសាជាតិ ឬក៏អ្នកនិពន្ឋចម្លងតាម
ដោយរក្សាទុកទំនៀមទម្លាប់ ប្រពៃណី លក្ខណៈរបស់បរទេសដដែល ហើយផ្ទុយពីផ្នត់គំនិត
និងទំនៀមទម្លាប់របស់ខ្មែរ ។
ឧទាហរណ៍៖ រឿងរាមាយណះ រឿងប៉ូលវីរហ្សីនី រឿង Romeo and Juliet... ។
១៣. យ៉ាងម៉េច ហៅថា លក្ខណៈមនុស្សក្នុងអក្សរសិល្ប៍ ? ចូរបង្ហាញលក្ខណៈមនុស្សតាមរយៈរឿង ក្រពើនិងអ្នកស្រែ និងរឿងរាមកេរ្តិ៍ ?
តាមលក្ខណះមនុស្សក្នុងអក្សរសិល្ប៍ គឺការលើកយកបញ្ហាមនុស្សមកចោទ
និងដោះស្រាយដោយបង្កើតបញ្ហាមួយហៅថា “បញ្ហាមនុស្ស” ។
ទោះបីអ្នកនិពន្ធលើកយកតួអង្គប្រភេទណាក៏ដោយ ទោះជាតួអង្គអច្ឆរិយៈក្តី សត្វក្តី
ឬធម្មជាតិក្តី ក៏តួអង្គទាំងនោះតំណាងមនុស្សក្នុងសង្គមជាដរាប។
លក្ខណៈមនុស្សតាមរយៈរឿងក្រពើនិងអ្នកស្រែគឺ៖ តួអង្គទន្សាយ តំណាងមនុស្សមានបញ្ញាស្រឡាញ់យុត្តិធម៌
។ ឯតួអង្គក្រពើ តំណាងមនុស្សកាចសាហាវ រមិលគុណ ។
លក្ខណះមនុស្សតាមរយៈរឿងរាមកេរ្តិ៍គឺ៖ តួអង្គហនុមាន តំណាងមនុស្សមានសមត្ថភាព
និងស្មោះត្រង់។ ឯតួអង្គក្រុងរាពណ៍ តំណាងមនុស្ស អាជ្ញានិយម ផ្ដាច់ការ និងអត្តនោម័តិ
។
១៤. ដូចម្តេច ហៅថា លក្ខណៈវណ្ណៈ?
លក្ខណៈវណ្ណៈ គឺជាលក្ខណៈអក្សរសិល្ប៍មួយប្រភេទ ដែលតាមរយៈនោះ អ្នកនិពន្ធលើកយកការតស៊ូវណ្ណៈ ការការពារឧត្តមគតិ
ចរិត គោលបំណងនៃវណ្ណៈណាមួយមកបង្ហាញ ។
ឧទាហរណ៍់៖ នៅក្នុងរឿងធនញ្ជ័យ អ្នកនិពន្ឋបង្ហាញពីបញ្ញាជន
តំណាងវណ្ណៈថ្នាក់ក្រោមដែលរូបឆាំងនឹងវណ្ណៈថ្នាក់លើ ។
១៥. យ៉ាងម៉េច ហៅថា លក្ខណៈសង្គម?
លក្ខណះសង្គម គឺជាលក្ខណៈអក្សរសិល្ប៍មួយប្រភេទ ដែលតាមរយៈនោះ
អ្នកនិពន្ធលើកយកបញ្ហាញសង្គមមនុស្ស ក្នុងសម័យកាលណាមួយមកបង្ហាញ
ចោទនិងដោះស្រាយក្នុងដំណើររឿង ។
ឧទាហរណ៍៖ នៅក្នុងរឿងទុំទាវបង្ហាញពីលក្ខណះសង្គមដែលប្រកាន់ប្រពៃណី
“នំមិនធំជាងនាឡិ” ... ។
១៦. ដូចម្តេច ហៅថា លក្ខណៈប្រវត្តិសាស្ត្រ?
លក្ខណៈប្រវត្តិសាស្ត្រ គឺជាលក្ខណៈអក្សរសិល្ប៍មួយប្រភេទ ដែលតាមរយៈនោះ
អ្នកនិពន្ធលើកយកដំណើរឿងទាក់ទងនឹងសម័យកាលខ្លះ ព្រឹត្តិការណ៍ផ្សេងៗខ្លះ
ដែលមានក្នុងប្រវត្តិសាស្ត្រមកបង្ហាញ ។
ឧទាហរណ៍៖
នៅក្នុងរឿងទុំទាវ តាមប្រវត្តិសាស្ត្រ រឿងនេះកើតនៅសម័យលង្វែក ។
នៅក្នុងរឿងភូមិតិរច្ឆាន តាមប្រវត្តិសាស្ត្រ រឿងនេះកើតនៅសម័យអាណានិគមបារាំង ។
១៧. យ៉ាងម៉េច ហៅថា លក្ខណៈជាតិ ?
លក្ខណះជាតិ គឺជាលក្ខណៈអក្សរសិល្ប៍មួយប្រភេទ ដែលតាមរយៈនោះ អ្នកនិពន្ធលើកយកតមៃ្លពិសេសរបស់ជាតិមកបង្ហាញក្នុងដំណើររឿងដែលទាក់ទងនឹងសីលធម៌
ជំនឿ ទំនៀមទម្លាប់សាសនា និងអ្វីៗ ដែលជាអត្តសញ្ញាណជាតិ ដើម្បីបណ្តុះគំនិតស្រឡាញ់
អភិរក្សការពារ និងអភិវឌ្ឍអរិយធម៌របស់ជាតិ ។
១៨. ដូចម្តេច ហៅថា លក្ខណៈអក្សរសិល្ប៍ ?
លក្ខណៈអក្សរសិល្ប៍ គឺបញ្ហាផ្សេងៗ ជាគ្រឿងសម្គាល់ចរិតលក្ខណៈទាំងឡាយណា
ដែលមាននៅក្នុងអក្សរសិល្ប៍ ដូចជា៖
លក្ខណះមនុស្ស លក្ខណះសង្គម លក្ខណះវណ្ណៈ លក្ខណៈប្រវត្តិសាស្ត្រ លក្ខណៈប្រជាជន
លក្ខណៈបក្ស លក្ខណៈជាតិ លក្ខណៈអន្តរជាតិ ។
១៩. សោភ័ណអក្សរសាស្ត្រចែកជាគោលធំៗ មានប៉ុន្មានបែប? អ្វីខ្លះ ?
សោភ័ណអក្សរសាស្ត្រចែកជាគោលធំៗ មាន ៣ បែប ។ គឺ៖
សោភ័ណខាងសំឡេង សោភ័ណខាងសំនួនវោហារ និងសោភ័ណខាងគំនិត ។
២០. លក្ខណះជាតិក្នុងអក្សរសិល្ប៍បែបខេមរនិយម មានអត្ថន័យ អត្ថរូប និងអត្ថរស
ដូចម្តេច?
អត្ថន័យ៖ អក្សរសិល្ប៍បែបខមរនិយម
បង្ហាញបញ្ហាជីវភាពជាក់ស្តែងរបស់មនុស្សក្នុងសង្គមស្របទៅតាមវប្បធម៌ អរិយធម៌ខ្មែរ
ពិសេសទាក់ទងទៅនឹងសង្គមបរិយាកាសខ្មែរ គឺទំនៀមទម្លាប់ប្រពៃណី ប្រវត្តិសាស្ត្រ
ភូមិសាស្ត្រខ្មែរជាដើម ។
អត្ថរូប៖ អត្ថបទអក្សរសិល្ប៍បែបខេមរនិយមនេះ
ច្រើនតែជាអត្ថបទដែលសរសេរជារឿងប្រលោមលោក ជាពាក្យកាព្យ ពាក្យរាយ
ក៏ជារឿងសម្រាប់អានកម្សាន្ត តែបង្កប់គតិអប់រំទូន្មានប្រៀនប្រដៅទៅរកផ្លូវរីកចម្រើន ។
អត្ថរស៖ តម្លៃរបស់ស្នាដៃអក្សរសិល្ប៍ខេមរនិយម ស្ដែងចេញពីការឆ្លុះបញ្ចាំងនូវតថភាពជាក់ស្តែង
ការអប់រំសីលធម៌ និងស្មារតីជាតិនិយមពិតៗ តាមរយៈភាពប៉ិនប្រសប់របស់អ្នកនិពន្ធ ។
👉👉 មានសំនួរ/អត្ថបទ បន្តទៀត
សូមចុចអាសយដ្ឋានខាងក្រោម ៖
១ សំនួរអក្សរសិល្ប៍ សំនួរខទី ១_១០ ដូចម្តេចហៅថាអក្សរសិល្ប៍ ?(edu4kh.com)
២ សំនួរអក្សរសិល្ប៍ អំពី អក្សរសិល្ប៍ព្រាហ្មណ៍និយម និងលក្ខណៈអក្សរសិល្ប៍ សំនួរទី ១១ -២០ (edu4kh.com)
៣ សំនួរអក្សរសិល្ប៍ អំពី ភាសាខ្មែរ មានការវិវត្តន៍ធំៗ មុខងារអក្សរសិល្ប៍ សំនួរទី ២១ _ ៣០ (edu4kh.com)
៤ សំនួរអក្សរសិល្ប៍ អំពីប្រភេទអក្សរសិល្ប៍ និង គោលអាស្រ័យធំៗនៃអក្សរសិល្ប៍ សំនួរទី ៣១ _៤០ (edu4kh.com)
៥ សំនួរអក្សរសិល្ប៍ អំពីលក្ខណៈចលនា និងគោលនិយម នៃអក្សរសិល្ប៍ សំនួរទី ៤១ - ៥០ (edu4kh.com)
សូមអរព្រះគុណនិងអរគុណ!