សំនួរអក្សរសិល្ប៍
កម្រងសំនួរទី ១ - ទី១០
១. ដូចម្តេចហៅថាអក្សរសិល្ប៍ ?
អក្សរសិល្ប៍ គឺជាប្រភេទរឿងដែលតុបតែងឡើងប្រកបដោយសិល្ប៍ ពោលគឺបំណិនប្រសប់ក្នុងការតែងនិពន្ធ
ដែលធ្វើអោយអ្នកអាន អ្នកស្តាប់ ចូលចិត្តចាប់អារម្មណ៍ រំភើបញាប់ញ័រ
គោតាមបញ្ជារបស់រឿង ។
២. តើអក្សរសាស្ត្រ និង អក្សរសិល្ប៍ មានលក្ខណះខុសគ្នាយ៉ាងណា?
អក្សរសាស្ត្រ សំដៅលើកម្រងវិជ្ជាក្បួនគម្ពីរ
ឬការសិក្សាអំពីអ្វីដែលអធិប្បាយផ្សាយឡើងដោយអក្សរ ដូចជា៖ ភូមិវិទ្យា ប្រវត្តិវិទ្យា
សង្គមវិទ្យា ទស្សនវិជ្ជា ភាសា វេយ្យាករណ៍ រឿងកម្សាន្ត...។
អក្សរសិល្ប៍ ជាអត្ថបទទាំងឡាយណា ដែលអ្នកនិពន្ធ សរសេរ
ហើយលើកយកបញ្ហាមនុស្សគ្រប់បែបយ៉ាង មកចោទនិងដោះស្រាយ ផ្សាយតាមរយះសិល្ប៍វិធី
ដែលសមស្របទៅតាមផលប្រយោជន៍ឋានៈវត្ថុបំណងណាមួយរបស់សង្គមជាដរាប ។
ដូចនេះយើងឃើញថា អក្សរសិល្ប៍គឺជាផ្នែកមួយនៃអក្សរសាស្ត្រ
ព្រោះវាក៏ជាកម្រងវិជ្ជាដែលសិក្សាអំពីសង្គមតាមរយៈអក្សរសាស្ត្រដែរ ។
៣. ដូចម្តេច ហៅថា ចលនាអក្សរសិល្ប៍ ?
ចលនាអក្សរសិល្ប៍
គឺជាការប្រែប្រួលនៃអក្សរសិល្ប៍តាមការនិយមនៃវណ្ណះ ឬស្រទាប់សង្គម បើទស្សនៈ ទ្រឹស្តី
គោលគំនិតណាមួយក្នុងដំណាក់កាលនៃប្រវត្តិសាស្ត្រ។
៤. ដូចម្តេច ហៅថា អក្សរសិល្ប៍ខេមរនិយម ?
ចលនាអក្សរសិល្ប៍ខេមរនិយមគឺជាអក្សរសិល្ប៍ប្លែកពីចលនាដទៃទៀត ដោយពុំបានយកគោលពីលទ្ធិណា
ឬសាសនាណាឡើយ
គឺជាការប្រឌិតតាមការដែលគេធ្លាប់ឃើញពិតដាក់ស្ដែងក្នុងសង្គមជាតិខ្មែរតែម្ដង ។
ដូច្នេះ អក្សរសិល្ប៍ខេមរនិយម ឬខ្មែរនិយម
គឺជាអក្សរសិល្ប៍ដែលបង្ហាញពីផ្នត់គំនិត ជំនឿ២ ពណ៌ ទនៀមទម្លាប់ មុខរបរបញ្ហាសង្គម
និងជីវភាពរស់នៅរបស់ប្រជាជនខ្មែរក្នុងសម័យកាលនីមួយៗ ស្របទៅតាមវប្បធម៌
និងសង្គមធម៌របស់ជាតិខ្មែរ ។
៥. អក្សរសិល្ប៍ខេមរនិយម មានឧត្តមគតិ ដូចម្តេច?
អក្សរសិល្ប៍ខេមរនិយម អប់រំមនុស្ស អោយមានសីលធម៌ល្អ
ស្រឡាញ់ភាពយុត្តិធម៌ ធ្វើអំពើល្អ ស្អប់ខ្ពើមអំពើអយុត្តិធម៌
ចេះដោះស្រាយបញ្ហាទៅតាមកាលទេសៈ ដោយជឿជាក់លើខ្លួនឯង និងយុត្តិធម៌សង្គម ។
៦. រឿងព្រះអាទិត្យថ្មីរះលើផែនដីចាស់
ស្ថិតនៅក្នុងអក្សរសិល្ប៍អ្វី ? ចូរផ្ដល់អំណះអំណាង?
រឿងព្រះអាទិត្យថ្មីរះលើផែនដីចាស់ ស្ថិតនៅក្នុងអក្សរសិល្ប៍
ខេមរនិយម។
អំណះអំណាង៖ រឿងនេះ ជារឿងរបស់ខ្មែរ
ដែលយកសង្គមារម្មណ៍មកចោទនិងដោះស្រាយទៅតាមប្រយោជន៍នៃសង្គមខ្មែរ ក្នុងគោលបំណង
ណែនាំប្រជាជនខ្មែរឱ្យស្រឡាញ់អំពើល្អ ស្អប់និងចៀសវាងអំពើអាក្រក់ ។ ។
៧. ដូចម្តេច ហៅថា អក្សរសិល្ប៍ពុទ្ធនិយម ? តើចលនាអក្សរសិល្ប៍ពុទ្ធនិយម មានអក្សរសិល្ប៍អ្វីខ្លះ?មានឧត្តមគតិ យ៉ាងម៉េចដែរ?
អក្សរសិល្ប៍ពុទ្ធនិយម គឺជាអត្ថបទរឿងរ៉ាវផ្សេងៗ
ដែលទាក់ទងនឹងការលើកយកទ្រឹស្តីព្រះពុទ្ធសាសនាធ្វើជាគោល
ទ្រឹស្ដីទាំងនោះស្ថិតនៅក្នុងគម្ពីរព្រះត្រៃបិដក ដែលអ្នកនិពន្ធលើកយកបញ្ជបុណ្យបាប
ផលល្អ ផលអាក្រក់របស់តួអង្គមកចោទនិងដោះស្រាយ។
អក្សរសិល្ប៍ពុទ្ធនិយម មានអក្សរសិល្ប៍ពុទ្ធនិយមសុទ្ធសាធ ពុទ្ធនិយមក្លាយ
និងពុទ្ធនិយមក្លែងក្លាយហួសហេតុ ឬពុទ្ធនិយមផ្លម ។
អក្សរសិល្ប៍ពុទ្ធនិយម អប់រំមនុស្សអោយជឿលើទស្សនៈកម្មផល បុណ្យបាប ធ្វើអំពើល្អ
វៀរចាកអំពើអាក្រក់ អប់រំអោយចេះតស៊ូព្យាយាម មានជំនឿជឿជាក់លើខ្លួនឯង ស្រឡាញ់សន្តិភាព
ដោះស្រាយបញ្ហាដោយសន្តិវិធី ចេះគិតពិចារណាត្រឹមត្រូវ ។
៨. ដូចម្តេច ហៅថា អក្សរសិល្ប៍ពុទ្ធនិយមសុទ្ធសាធ?
អក្សរសិល្ប៍ពុទ្ធនិយមសុទ្ឋសាធ
គឺសម្គាល់លើអត្ថបទស្នាដៃអក្សរសិល្ប៍ទាំងឡាយណាមាននៅក្នុងរឿងទសជាតក
ដែលជាគម្ពីរដ៏សំខាន់នៅក្នុងព្រះពុទ្ធសាសនា ។
ឧទាហរណ៍ រឿងទាំង ១០ នៃទសជាតក ដែលគេចាត់ទុកជាស្នាដៃអក្សរសិល្ប៍សុទ្ធសាធ
មានដូចជា៖
1. រឿងតេមិយជាតក
2. មហាជនកជាតក
3. សុវណ្ណសាមជាតក
4. នេមិរាជជាតក
5. មហោសថជាតក
6. ភូរិទត្តជាតក
7. ចន្ទកុមារជាតក
8. នារទព្រហ្មជាតក
9. វិធុរជាតក
10. និងរឿងព្រះវេស្សន្តរជាតក ។
៩. ដូចម្តេច ហៅថា អក្សរសិល្ប៍ពុទ្ធនិយមក្លែងក្លាយ ?
អក្សរសិល្ប៍ក្លែងក្លាយ គឺសម្គាល់លើអត្ថបទស្នាដៃអក្សរសិល្ប៍ទាំងឡាយណាមាននៅក្នុងគម្ពីរបញ្ញាសជាតក ដែលបាននិយាយអំពីដំណើរជីវិតទាំង ៥០
ជាតិរបស់ព្រះពោធិសត្វ ។
អក្សរសិល្ប៍ពុទ្ធនិយមក្លែងក្លាយ បើបរិយាយទាក់ទងនឹងទ្រឹស្តីក្នុងព្រះពុទ្ធសាសនាតិចតួចហើយពុំស្ថិតនៅក្នុងគម្ពីរពុទ្ធវចនះទេ
។
ឧទាហរណ៍ដូចជារឿងសមុទឃោសៈ រឿងសុធនុ រឿងសិរីវិបុលកិត្តិ រឿងសិរិចូឡាមណី ...។
១០. ដូចម្តេច ហៅថា អក្សរសិល្ប៍ពុទ្ធនិយមក្លែងក្លាយហួសហតុ?
អក្សរសិល្ប៍ពុទ្ធនិយមក្លែងក្លាយហួសហេតុ គឺជាប្រភេទអក្សរសិល្ប៍
ដែលពុំមាននៅក្នុងគម្ពីរ ទសជាតក បញ្ជាសជាតក ឬក្នុងគម្ពីរបុរាណច្បាស់លាស់ទេ។
វាជាស្នាដៃអក្សរសិល្ប៍ខ្មែរកើតនៅសម័យកណ្តាល ដែលទទួលឥទ្ធិពលតិចឬច្រើន
ពីឥទ្ធិពលពុទ្ធសាសនាផងដែរ ។
អក្សរសិល្ប៍ពុទ្ធនិយមក្នុងក្លាយហួសហេតុ ច្រើនជាប្រភេទសាស្ត្រល្បែង
ដែលកើតមានឡើងនៅសតវត្សទី ១៨ ឬ ១៩ ដែលមានឈ្មោះអ្នកនិពន្ធច្បាស់លាស់ដូចជា៖ រឿងក្រុងសុភមិត
និពន្ធដោយ កោសាធិបតីកៅ ឆ្នាំ ១៧៩៨ និង រឿងមរណមាតា និពន្ធដោយ ឥន្ទបញ្ញាអ៊ុក
ឆ្នាំ ១៨៧៧ ។ល។
👉👉 មានសំនួរ/អត្ថបទ បន្តទៀត
សូមចុចអាសយដ្ឋានខាងក្រោម ៖
១ សំនួរអក្សរសិល្ប៍ សំនួរខទី ១_១០ ដូចម្តេចហៅថាអក្សរសិល្ប៍ ?(edu4kh.com)
២ សំនួរអក្សរសិល្ប៍ អំពី អក្សរសិល្ប៍ព្រាហ្មណ៍និយម និងលក្ខណៈអក្សរសិល្ប៍ សំនួរទី ១១ -២០ (edu4kh.com)
៣ សំនួរអក្សរសិល្ប៍ អំពី ភាសាខ្មែរ មានការវិវត្តន៍ធំៗ មុខងារអក្សរសិល្ប៍ សំនួរទី ២១ _ ៣០ (edu4kh.com)
៤ សំនួរអក្សរសិល្ប៍ អំពីប្រភេទអក្សរសិល្ប៍ និង គោលអាស្រ័យធំៗនៃអក្សរសិល្ប៍ សំនួរទី ៣១ _៤០ (edu4kh.com)
៥ សំនួរអក្សរសិល្ប៍ អំពីលក្ខណៈចលនា និងគោលនិយម នៃអក្សរសិល្ប៍ សំនួរទី ៤១ - ៥០ (edu4kh.com)
សូមអរព្រះគុណនិងអរគុណ!
សំនួរអក្សរសិល្ប៍ ទាំង១០ ខាងលើ
១. ដូចម្តេចហៅថាអក្សរសិល្ប៍ ?
២. តើអក្សរសាស្ត្រ និង អក្សរសិល្ប៍ មានលក្ខណះខុសគ្នាយ៉ាងណា?
៣. ដូចម្តេច ហៅថា ចលនាអក្សរសិល្ប៍ ?
៤. ដូចម្តេច ហៅថា អក្សរសិល្ប៍ខេមរនិយម ?
៥. អក្សរសិល្ប៍ខេមរនិយម មានឧត្តមគតិ ដូចម្តេច?
៦. រឿងព្រះអាទិត្យថ្មីរះលើផែនដីចាស់ ស្ថិតនៅក្នុងអក្សរសិល្ប៍អ្វី ? ចូរផ្ដល់អំណះអំណាង?
៧. ដូចម្តេច ហៅថា អក្សរសិល្ប៍ពុទ្ធនិយម ? តើចលនាអក្សរសិល្ប៍ពុទ្ធនិយម មានអក្សរសិល្ប៍អ្វីខ្លះ?មានឧត្តមគតិ យ៉ាងម៉េចដែរ?
៨. ដូចម្តេច ហៅថា អក្សរសិល្ប៍ពុទ្ធនិយមសុទ្ធសាធ?
៩. ដូចម្តេច ហៅថា អក្សរសិល្ប៍ពុទ្ធនិយមក្លែងក្លាយ ?
១០. ដូចម្តេច ហៅថា អក្សរសិល្ប៍ពុទ្ធនិយមក្លែងក្លាយហួសហតុ?